Бүгін зияткерлік бұзылыстары бар тәрбиеленушілердің әлеуметтік өзара әрекеттесу деңгейін зерттеуге және коммуникация паспортын әзірлеу материалдарын дайындауға арналған жұмыс тобының отырысы өтті

Бүгін зияткерлік бұзылыстары бар тәрбиеленушілердің әлеуметтік өзара әрекеттесу деңгейін зерттеуге және коммуникация паспортын әзірлеу материалдарын дайындауға арналған жұмыс тобының отырысы өтті.

Отырыс барысында білім алушылардың коммуникативтік дағдыларын жүйелі түрде зерттеудің өзектілігі және оларды бағалауда кешенді тәсілді қолдану қажеттілігі атап өтілді. Қатысушылар зияткерлік бұзылыстары бар балалардың коммуникациясының жеке ерекшеліктерін анықтауға және сипаттауға бағытталған жұмыстың мақсаттары мен міндеттерін талқылады.

Жұмыс тобының мүшелері іс-шаралар жоспарын әзірледі. Аталған жоспарға әлеуметтік өзара әрекеттесу критерийлері мен көрсеткіштерін анықтау, бастапқы диагностика материалдарын әзірлеу, білім алушылардың жеке коммуникативтік мүмкіндіктері мен қиындықтарын сипаттау, сондай-ақ коммуникация паспортының құрылымы мен мазмұнын қалыптастыру кірді. Нәтижелерді мониторингтеу және талдау кезеңдері белгіленіп, жұмыс бағыттары қатысушылар арасында бөлінді.

Сонымен қатар, мектеп педагогтеріне арналған коммуникация паспортының деректерін зерттеу және өңдеу мәселелері бойынша оқыту сабақтарын өткізу жоспарланды. Талқылау барысында оқушылардың коммуникация паспортын құрудың теориялық негіздері қарастырылып, диагностиканы жүргізу мерзімдері, коммуникативтік дағдылардың қалыптасу деңгейлері, сондай-ақ білім алушылардың жас және жеке ерекшеліктерін ескеру мәселелері айқындалды.

Жоспарланған іс-шараларды іске асыру педагогтердің жұмысында бірыңғай әдістемелік тәсілді қамтамасыз етуге, тәрбиеленушілерді диагностикалау мен сүйемелдеудің сапасын арттыруға, сондай-ақ зияткерлік бұзылыстары бар білім алушылардың әлеуметтік өзара әрекеттесуін тиімді дамытуға жағдай жасауға мүмкіндік береді.