Кәсіптік бағдар беру жұмысы аясында өткен аптада мектептің әлеуметтік-психологиялық қызметі, яғни әлеуметтік педагог Айжан Сериковна Каримова, психолог Светлана Викторовна Трофимова тәрбиеленушілер үшін Ақмола облысы бойынша Төтенше жағдайлар департаменті N 1 мамандандырылған өрт сөндіру бөліміне экскурсия ұйымдастырды.

Экскурсия балалар үшін ерлік, жауапкершілік және күнделікті жасалатын нағыз батырлық әлеміне саяхат болды. Бөлім қызметкерлері оқушыларды жылы қарсы алып, құтқарушы мамандығының ерекшеліктері туралы, төтенше жағдайларда командалық бірліктің маңызы жөнінде әңгімеледі.

Тәрбиеленушілер бөлімнің тарихи мұражайына ерекше қызығушылық танытты. Олар архивтік фотосуреттермен, әр жылдардағы қызметтік киім үлгілерімен танысып, қызметкерлердің ерлік істері туралы мәлімет алды. Бұл балаларға мамандық тарихын тереңірек түсінуге мүмкіндік берді.

Ең әсерлі сәт – заманауи техникалармен танысу болды. Балалар өрт сөндіру көліктерін жақыннан көріп, олардың жабдықтарын қарап, әр құралдың атқаратын қызметі туралы мағлұмат алды. Кейбірі арнайы қорғаныс киімдерін киіп көріп, оның салмағын сезініп, бұл мамандықтың қаншалықты жауапты әрі күрделі екенін түсінді.

Экскурсия танымдық әрі шабыттандыратын шара болды. Бұл кездесу кейбір балалар үшін болашақ мамандықты таңдауға ой салса, барлығы үшін құтқарушылар еңбегіне деген құрметті арттырды.